लोक सहित्य में बिग्गाजी
लोक सहित्य में बिग्गाजी के सम्बन्ध में अनेक दोहे और छंद
जनमानस मे प्रचलित हैं जिन्से अनेक जानकारी प्राप्त
होती हैं:
सौ ए कोसे रिच्छा करो हिंदवाणी रा सूर ।
इगियारी संवतां तणो बरस इक्कीसो साल ।
काती मास तिथी तेरसो वार शनिसर वार ।
राजा तो रतन सिंघ सिरदार सिंघ राजकंवार ।
धरसी बैठा पाठवी भली बताई वार ।
बडो भाई सदा सुख पिता नांव श्रीराम ।
सिंवर देवी सुळतानवी औ चंद कयो लछीराम ।
बिग्गाजी के छंद
सिंवरू देवी सारदा लुळहर लागूं पाय ।
बिगमल हुवो बीकाणगढ सोभा देवूं बताय ।
कियो रड़ाको राड़ सूं लेसूं निजपत नांव ।
सारद सीस नवाय कर करसूं कथणी काम ।
बीदो बीको राजवी गढ बीकाणो गांव ।
जूना खेड़ा प्रगट किया इडक बिगो है धाम ।
रूघपत कुळ में ऊपन्यो भगीरथ वंश मांय ।
मामा गोदारा भीम-सा, नानै चूहड़ का नांव ।
रीड़ज गढ रो पाटवी परण्यो माला रै गांव ।
धिन कर चाल्यौ सासरै नाईज लिया बुलाय ।
कंगर कढाई कोरणी कपड़ा लिया सिलाय ।
कचव कंठी सोवणी गळ झगबग मोती झाग ।
मीमां जरी जड़ाव की माथै कसूमल पाग ।
धिन कर चाल्यो सासरै मात-पिता अरु मेंहद ।
कमेत घोड़ी बो धणी बण्यो पून्यूं को चंद ।
उठै राठ की हुई चढाई, दिल्ली का तखत हजारो ।
क्या मक्का बलखबुखारोचढ्यो राठकर हौकारो ।
सिंवर मीर पीर पट्टाण ध्यान मैंमद का धर रे ।
किसो मुलक लौ मार किसो अक छोड़ो थिर रे ।
कहै राठ इक बात कयो थे हमरो करो ।
मार जाट का लोग डेरा जसरसर धरो ।
डावी छोड़दो जखड़ायण जींवणी नागौरी गउवों घेरो ।
चढ्यो राठ को लोग सुगन ने बोल झडा़ऊ ।
पिर्या सिंध सादूल सुगन बै हुया पलाऊ ।
श्री बिग्गाजी महाराज की आरती
जय बिगमल देवा-देवा-जाखड़कुल के सूरज करूं मैं नित सेवा ।
जाखड़ वंश उजागर, संतन हित कारी (प्रभु संतन)
दुष्ट विदारण दु:ख जन तारण, विप्रन सुखकारी ॥ 1 ॥
सत धर्म उजागर सब गुण सागर, मंदन पिता दानी ।
सती धर्म निभावण सब गुण पावन, माता सुल्तानी ॥ 2 ॥
सुन्दर पग शीश पग सोहे, भाल तिलक रूड़ो देवा-देवा ।
भाल विशाल तेज अति भारी, मुख पाना बिड़ो ॥ 3 ॥
कानन कुन्डल झिल मिल ज्योति, नेण नेह भर्यो ।
गोधन कारन दुष्ट विदारन, जद रण कोप करयो ॥ 4 ॥
अंग अंगरखी उज्जवल धोती, मोतीन माल गले ।
कटि तलवार हाथ ले सेलो, अरि दल दलन चले ॥ 5 ॥
रतन जडित काठी, सजी घोड़ी, आभाबीज जिसी ।
हो असवार जगत के कारनै, निस दिन कमर कसी ॥ 6 ॥
जब-जब भीड़ पड़ी दुनिया में , तब-तब सहाय करी ।
अनन्त बार साचो दे परचो, बहु विध पीड़ हरी ॥ 7 ॥
सम्वत दोय सहस के माही, तीस चार गिणियो ।
मास आसोज तेरस उजली, मन्दिर रीड़ी बणियो ॥ 8 ॥
दूजी धाम बिग्गा में सोहे, धड़ देवल साची ।
मास आसोज सुदी तेरस को, मेला रंग राची ॥ 9 ॥
या आरती बिगमल देवा की, जो जन नित गावे ।
सुख सम्पति मोहन सब पावे, संकट हट जावै ॥ 10 ॥
No comments:
Post a Comment